काठमाडौँ । भाइटीका लगाइसकेसँगै यस वर्षको तिहार पर्व सम्पन्न भएको छ । तिहार सकिएसँगै तराई–मधेशका विभिन्न जिल्लामा अब छठ पर्वको तयारी र चहलपहल सुरु भएको छ ।
छठपर्व कात्तिक शुक्ल चतुर्थीका दिन आरम्भ भई षष्ठीका दिन सूर्योपासना गरेर सम्पन्न गरिने पर्व हो । यस पर्वलाई स्वागत गर्न तराई–मधेशका पोखरी, नदी किनारा र घाटहरूमा सरसफाइ तथा सजावटको काम तीव्र रूपमा भइरहेको छ ।
मिथिलाञ्चल क्षेत्रको पौराणिक र सांस्कृतिक महत्त्व बोकेको वीरगञ्जमा रहेका घडिअर्वा पोखरी, नगवापोखरी, छपकैया पोखरी, श्रीपुर र रानीघाटलगायत स्थानमा स्थानीयवासीहरू सक्रिय रूपमा घाट सिँगार्ने र तयारी गर्ने कार्यमा जुटेका छन् ।
वीरगञ्जको घडिअर्वा पोखरीमा विगत दुई दशकदेखि निरन्तर रूपमा छठ पर्व मनाउने परम्परा रहेको छ । यस वर्षको मुख्य छठपर्व कात्तिक १० गते (कात्तिक शुक्ल षष्ठी)का दिन मनाइनेछ ।
