बारा । करैयामाई गाउँपालिका वडा नं. ४ स्थित चिम्नी भट्टामा लुकाई छिपाई राखेको अवैध लागूऔषध गाँजा करिब १ सय १० केजी सहित ३ जनालाई बिहीबार राति प्रहरीले पक्राउ गरेको छ ।
पक्राउ पर्नेहरुमा पर्सा सहोदरामाई नगरपालिका वडा नं. १० बस्ने ६० वर्षीय समसुल हक देवान, चितवन राप्ती गाउँपालिका( ७ बस्ने ४५ वर्षीय लक्ष्मी बहादुर राई र बारा कलैया उपमहानगरपालिका(१७ बस्ने ३० वर्षीय सुबोध प्रसाद यादव रहेका छन् ।
उक्त स्थानमा ना. ७ ख ४२५२ नम्बरको ट्रकमा बोकी लिई आएको अवैध लागूऔषध चिम्नी भट्टामा लुकाई रहेको भन्ने खबर प्राप्त हुनासाथ जिल्ला प्रहरी कार्यालय बारा र प्रहरी चौकी गंजभवानीपुरबाट खटिएको प्रहरीले भट्टामा लुकाई रहेको अवस्थामा ९ वटा पोकामा रहेको उक्त परिमाणको लागूऔषध सहित फेला पारी उनीहरुलई पक्राउ गरेको हो ।
प्रहरीले समसुल हक देवान चढी आएको प्रदेश ०२–०३–००१ प ९४१ नम्बरको मोटरसाइकल र ट्रक समेत बरामद गरेको छ ।
यस सम्बन्धमा थप अनुसन्धान गरिरहेको जिल्ला प्रहरी कार्यालय बाराका प्रवक्ता डीएसपी गौतम मिश्रले बताए ।
