काठमाडौं । बुधबार विभिन्न प्रयोगशालामा १० हजार ४९४ जनाको पिसिआर परीक्षण गर्दा थप १५३९ जनामा कोरोना भाइरस (कोभिड–१९) को संक्रमण पुष्टि भएको छ । आजसम्म ८ लाख ७२ हजार २७४ जनाको पिसिआर परिक्षण गरिएको छ ।
स्वास्थ्य तथा जनसंख्या मन्त्रालयको शनिबारको नियमित प्रेस ब्रिफिङमा मन्त्रालयका प्रवक्ता प्रा. डा. जागेश्वर गौतमले पछिल्लो २४ घण्टामा १५३९ जनामा कोरोना संक्रमण पुष्टि गरेका हुन् । योसँगै कोरोना भाइरसबाट कुल संक्रमितको संख्या ५८ हजार ३२७ पुगेको छ ।
पछिल्लो २४ घण्टामा काठमाडौं, भक्तपुर र ललितपुरमा ७३७ जनामा कोरोना भाइरसको संक्रमण पुष्टि भएको स्वास्थ्य तथा जनसंख्या मन्त्रालयको नियमित प्रेस ब्रिफिङमा जनाएको छ । मन्त्रालयका प्रवक्ता प्रा. डा. जागेश्वर गौतमका अनुसार उपत्यकाका काठमाडौँमा ६५२, भक्तपुरमा २५ र ललितपुरमा ६० जनामा कोरोना पुष्टि भएको हो ।
हालसम्म क्वारेन्टाइनमा रहनेको संख्या ७ हजार ७०१ जना रहेका छन् । त्यसैगरी संक्रमित सक्रिय संख्या १६ हजार २४२ जना रहेकोमा छ । सक्रिय संक्रमित मध्ये होम आइसोलेसनमा बस्नेको संख्या ७,७०१ जना रहेको छ ।
पछिल्लो २४ घण्टामा कोरोनामुक्त भई डिस्चार्ज हुनेको संख्या १०६८ रहको छ । हालसम्म डिस्चार्ज हुने जम्मा संख्या ४१ हजार ७०६ छ ।
आइसीयूमा रहने कोरोना संक्रमित देशभर १७३ जना र भेन्टिलेटरमा रहने संक्रमित बिरामीको संख्या २६ रहेको प्रवक्ता गौतमले जानकारी दिएका छन् ।
२४ घण्टामा कोरोनाले ८ जनाको ज्यान गएको छ । योसँगै नेपालमा कोरोनाले मृत्यु हुनेको संख्या ३७९ पुगेको छ ।
