ललितपुर । ललितपुरमा अनिवार्य तथा निःशुल्क शिक्षा कार्यान्वयनलाई प्रभावकारी बनाउन अभिमुखिकरण कार्यक्रम शुक्रबार सम्पन्न भएको छ । नेपाल पत्रकार महासङ्घ ललितपुर शाखाको समन्वय तथा शिक्षा विकास तथा समन्वय इकाई कार्यालय ललितपुरको सहयोगमा कार्यक्रम आयोजना गरिएको हो ।
कार्यक्रममा ललितपुरका सामुदायिक तथा निजी विद्यालयका अभिभावक, विद्यार्थी, पत्रकारलगायत सरोकारवाला निकायको उल्लेखनीय सहभागिता रहेको थियो ।
शिक्षा विकास तथा समन्वय इकाई ललितपुरका शाखा अधिकृत ओमबहादुर विश्वकर्माले कार्यक्रमको उद्देश्यबारे प्रकाश पार्दै सहजीकरण गरेका थिए । उनले विद्यालयको पहुँचभन्दा टाढा रहेका बालबालिकालाई विद्यालयसम्म ल्याउने र औपचारिक शिक्षा लिन नसकेका बालबालिकालाई अनौपचारिक शिक्षामार्फत समेट्ने विषयमा जानकारी गराए ।
अभिमुखिकरणमा छलफल, गोष्ठी, भेला तथा अन्तरक्रियामार्फत विद्यालय बाहिर रहेका बालबालिकालाई शिक्षामा जोड्ने उपायबारे सहभागीलाई जानकारी गराइएको थियो ।
नयाँपत्रिका दैनिकका पत्रकार शिवहरि घिमिरेले संविधान, ऐन, नियम तथा कानुनको परिधिभित्र रहेर राष्ट्रिय शिक्षा नीतिलाई सफल बनाउन सबै पक्षको सहकार्य आवश्यक रहेको बताए । उनले राज्यले दिएको अधिकारको सदुपयोग गर्दै थप अधिकारका लागि कानुनी प्रक्रियाबाट अघि बढ्नुपर्नेमा जोड दिए ।
निजी विद्यालयका सञ्चालक तथा अग्रज पत्रकार मुक्तिनाथ आचार्यले २०८५ सम्म अनिवार्य तथा निःशुल्क शिक्षाको पहुँच सबैमा पु¥याउनुपर्नेमा जोड दिए ।
अग्रज पत्रकार प्रभुनारायण बस्नेतले भने सो अवधिसम्म पूर्ण कार्यान्वयन हुनेमा शङ्का व्यक्त गर्दै सामुदायिक विद्यालयहरूले विभिन्न बहानामा शुल्क असुल्ने गरेको गुनासो गरे ।
नेपाल पत्रकार महासङ्घ ललितपुर शाखाका अध्यक्ष रामहरि कार्कीले महासङ्घसँग सहकार्यमा कार्यक्रम आयोजना गरिएकोमा खुसी व्यक्त गरे । उनले नेपालको संविधानको धारा ३१ मा शिक्षा सम्बन्धी हकको व्यवस्था गरिएको उल्लेख गर्दै प्रत्येक नागरिकलाई आधारभूत तहसम्म अनिवार्य तथा निःशुल्क र माध्यमिक तहसम्म निःशुल्क शिक्षा पाउने अधिकार सुनिश्चित गरिएको बताए ।
संविधानले प्रत्याभूत गरेको उक्त मौलिक हकको कार्यान्वयनका लागि अनिवार्य तथा निःशुल्क शिक्षा सम्बन्धी ऐन, २०७५ तथा नियमावली, २०७७ जारी गरिएको उनले जानकारी दिए ।
