काठमाडौं । मंगलबार विभिन्न प्रयोगशालामा १२ हजार ८८ जनामा पिसिआर परीक्षण गर्दा थप १०६९ जनामा कोरोना भाइरस (कोभिड–१९) को संक्रमण पुष्टि भएको छ, जसमा पुरुष ७२५ र महिला ३४४ रहेका छन् । आजसम्म ७ लाख ५ हजार ५६० जनाको पिसिआर परीक्षण गरेको छ ।
स्वास्थ्य तथा जनसंख्या मन्त्रालयको मंगलबारको नियमित प्रेस ब्रिफिङमा मन्त्रालयका प्रवक्ता प्रा. डा. जागेश्वर गौतमले पछिल्लो २४ घण्टामा १०६९ जनामा कोरोना संक्रमण पुष्टि गरेका हुन् । योसँगै नेपालमा कोरोना संक्रमितको संख्या ४० हजार ५२९ जना पुगेको छ ।
मंगलबारको नियमित प्रेस ब्रिफिङमा स्वास्थ्य मन्त्रालयका प्रवक्ता डा. गौतमले काठमाडौंका ३९३, ललितपुरका ५८ र भक्तपुरका ३० जनासहित ४८१ जनामा कोरोना संक्रमण पुष्टि भएको जानकारी दिए ।
हालसम्म क्वारेन्टाइनमा रहनेको संख्या ७ हजार ३९० जना रहेका छन् । त्यसैगरी संक्रमित सक्रिय सख्ंया १८ हजार ११२ जना रहेकोमा छ । सक्रिय संक्रमित मध्ये होम आइसोलेसनमा बस्नेको संख्या ७ हजार २८० जना रहेको छ ।
१२७ जना आईसियू र १७ जनाको भेन्टिलेटरमा उपचार भैरहेका छन । कोरोना भाइरस संक्रमणबाट थप ११ जनाको मृत्यु भएको छ। योसहित ज्यान गुमाउनेको संख्या २३९ पुगेको हो।
