काठमाडौं । नेपालमा दोस्रो लहर सुरु भएयता कोरोना भाइरस (कोभिड–१९) संक्रमणको संख्याले रेकर्ड कायम गरेको छ । पछिल्लो २४ घण्टमा देशभर ५७ सय २७ जनालाई कोरोना भाइरस संक्रमण पुष्टि भएको छ । सोही अवधिमा ९२८ जना निको भएका छन् भने ३३ जनाको मृत्यु भएको छ ।
१५ हजार ३९२ जनाको पीसीआर परीक्षण भएकोमा ५६५७ जनालाई पोजेटिभ देखिएको छ भने ५२५ जनाको एन्टीजेन परीक्षण हुँदा ७० जनालाई संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ ।
अहिलेसम्म नेपालमा कोरोना संक्रमितको संख्या ३ लाख २३ हजार १८६ पुगेको छ । जसमध्ये २ लाख ८१ हजार ९५ निको भएका छन् भने ३२ सय ७९ जनाको मृत्यु भएको छ । अहिले सक्रिय संक्रमितको संख्या ३८ हजार ८१३ रहेको छ ।
काठमाडौं उपत्यकामा एकै दिन करिब ३ हजार जनामा कोरोना भाइरस संक्रमण पुष्टि भएको छ । यो संख्या हिजोकोभन्दा झण्डै दोब्बर हो । हिजो उपत्यकामा १५ सय ६१ जनामा कोरोना संक्रमण पुष्टि भएको थियो ।
आज काठमाडौंमा दुई हजार ४०४, ललितपुरमा ४१९ र भक्तपुरमा १३३ गरी २९५६ जनामा संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ ।
