काठमाडौं । नेपालमा कोरोना भाइरस (कोभिड–१९) संक्रमितको संख्याले नयाँ रेकर्ड बनाएको छ । पछिल्लो २४ घण्टामा थप ७२ सय ११ जनामा कोरोना भाइरस संक्रमण पुष्टि भएको छ । तीमध्ये काठमाडौं उपत्यकामा ३५ सय ९५ जनालाई कोरोना भाइरस संक्रमण पुष्टि भएको छ । काठमाडौंमा २७ सय ४४, भक्तपुरमा ३०१ र ललितपुरमा ५५० जनालाई पोजेटिभ देखिएको छ ।
स्वास्थ्य तथा जनसंख्या मन्त्रालयका प्रवक्ता प्रा. डा. जागेश्वर गौतमले देशभर ७ हजार २११ लाई कोरोना पुष्टि भएको जानकारी दिए ।
अहिले सक्रिय संक्रमित ४८ हजार ७११ रहेको छ । गौतमका अनुसार १६ हजार १४७ जनाको पीसीआर परीक्षण भएकोमा ७ हजार १३७ जना र ६२३ जनाको एन्टीजेन परीक्षण भएकोमा ७४ जनालाई कोरोना संक्रमण पुष्टि भएको हो ।
पछिल्लो २४ घण्टामा १६ सय १२ जना निको भएका छन् भने २७ जनाको मृत्यु भएको छ । आज थपिएकासँगै नेपालमा कोरोना संक्रमितको संख्या ३ लाख ३६ हजार ३० पुगेको छ जसमध्ये २ लाख ८३ हजार ९९४ जना संक्रमणमुक्त भएका छन् । ३३ सय २५ संक्रमितको मृत्यु भइसकेको छ ।
