काठमाडौँ । राष्ट्रिय परीक्षा बोर्डले शैक्षिक सत्र २०८०–८१ मा कक्षा ११ मा भर्ना भएका विद्यार्थीहरूका लागि रजिस्ट्रेसन आवेदन फाराम खुला गरेको छ । रजिस्ट्रेसन आवेदन फारामका साथ प्रधानाध्यापकबाट प्रमाणित गरिएको माध्यमिक शिक्षा परीक्षा कक्षा १० को ग्रेडसिटको प्रतिलिपि संलग्न गर्नुपर्ने बोर्डले जनाएको छ ।
यस्तै रजिस्ट्रेसन आवेदन फाराम बापत बोर्डमा बुझाउनुपर्ने रकम पौष १५ गतेसम्म प्रति विद्यार्थी चारसय रुपैयाँसहित बोर्डका सम्बन्धित कार्यालयको खातामा दाखिला गरिसक्नुपर्ने छ ।
सो समयमा रकम दाखिला गर्न नसक्ने विद्यार्थीहरूको हकमा पौष मसान्तभित्र विलम्ब शुल्क सहित प्रति विद्यार्थी आठसय रुपैयाँका दरले हुन आउने रकम दाखिला गरी मिति माघ १५ गतेभित्र सम्बन्धित विद्यालयहरूले बैंक भौचर र रजिस्ट्रेसन आवेदन फाराम बोर्डको सम्बन्धित कार्यालयमा बुझाई सक्नुपर्ने सूचनामा उल्लेख छ ।
सूचनामा अतिरिक्त विषय अध्ययन गर्न चाहने विद्यार्थीहरूले समेत अनिवार्य रूपमा आफूले अध्ययन गर्न चाहेको विषय रजिस्ट्रेसन फाराममा उल्लेख गर्नुपर्ने उल्लेख छ । रजिस्ट्रेसन आवेदन फाराम विद्यार्थी स्वयंले भरेको हुनुपर्नेछ ।
