काठमाडौं । वौद्व महांकालस्थित जनकल्याण माध्यमिक विद्यालयले ७१औँ वार्षिकोत्सव शनिवार मनाएको छ। विद्यालय प्राङ्गणमा आयोजना गरिएको वार्षिकोत्सव कार्यक्रमको उद्घाटन संसदको अर्थ समितीका सभापति सन्तोष चालिसेले गरे ।
कार्यक्रमका प्रमुख अतिथि समेत रहेका सभापति चालिसेले नेपालबाट विदेश जाने विद्यार्थी संख्या बढिरहेकोले यसलाई कम गर्नतर्फ सरोकारवालाहरुले बढी चासो दिनुपर्ने बताए । खाडीलगायत विभिन्न देशमा रोजगारको लागि जानेहरुले नेपालमा रेमिट्यान्स भित्र्याए पनि पढ्न जाने विद्यार्थीहरुबाट राज्यलाई कुनै किसिमको फाइदा नभएको उनको भनाई छ । त्यसकारण अब नेपालमा गरिखाने किसिमको शिक्षा आवश्यक रहेको सभापति चालिसेले औल्याए । ‘विदेश जाने विद्यार्थीको लर्को छ, तर रोक्ने प्रयास भएको छैन, आजको शिक्षाले मुलुक अघि बढ्दैन, यो गरिखाने किसिमको छैन, त्यसैले मुलुक सुहाउँदो र गरिखाने शिक्षा चाहिन्छ । उपत्यकाभित्रको उत्कृष्ट सामुदायिक विद्यालयभित्र पर्ने यस विद्यालयले व्यावहारिक, गुणस्तरीय, प्रविधिमैत्री र नियमित पठनपाठन गराउदै आएको छ । विद्यालयले पठनपाठनको गुणस्तरीयतामा ध्यान दिएकोले विद्यार्थीको आकर्षण बढेको विद्यालयले जनाएको छ । विद्यालय व्यवस्थापन समिति, शिक्षक र प्रधानाध्यापकको मिहिनेतका कारण विद्यालय अब्बल बनेको विद्यालयका सूचना अधिकारी सुरेशकुमार कटुवालले बताए ।
विद्यालयका निमित्त प्रधानाध्यापक दिपकबाबु श्रेष्ठले विद्यालयको भौतिक सुधारसँगै पढाइमा सुधार ल्याउन सकिएको बताउदै आगामी दिनमा शिक्षाको गुणस्तर थप राम्रो पार्ने बताए । उनले वि।सं २०१० सालदेखि सरकारी शिक्षा प्रणालीमा जनकल्याणले प्रभावकारी भूमिका निभाउँदै आएको बताउँदै वर्तमान अवस्थामा यस विद्यालयको शैक्षिक सुधारमा धेरै परिवर्तन आएको बताए । शैक्षिक गुणस्तरमा चासो दिने हो भने सरकारी विद्यालय पनि निजीभन्दा अब्बल हुन सक्ने उनको बुझाई छ।
वार्षिकोत्सव कार्यक्रममा विद्यालय व्यवस्थापन समितिका पदाधिकारी, शिक्षक, भूतपूर्व शिक्षक तथा विद्यार्थी, स्थानीय जनप्रनिनिधि, विभिन्न विद्यालयका प्रधानाध्यापक, समाजसेवीलगायतको उपस्थिति रहेको थियो । सो अवसरमा वार्षिकोत्सवका अवसरमा विद्यालयले उत्कृष्ट शिक्षक, कर्मचारी, पूर्वशिक्षक, समाजसेवी, सञ्चारकर्मीलगायतलाई सम्मान तथा पुरस्कृत गरेको थियो । कार्यक्रममा विद्यालयद्धारा प्रकाशित प्रयास पुस्तक पनि विमोचन गरिएको छ ।
