काठमाडौं । सरकारले भोलि सोमबारदेखीका सबै परीक्षा रोक्ने निर्णय गरेपनि त्रिभुवन विश्वविद्यालयले सोमबारका लागि तय भएको परीक्षा स्थगित नभएको जानकारी दिएको छ । उपप्रधानमन्त्री ईश्वर पोखरेल नेतृत्वको सीसीएमसीको बैठकले मुलुकमा कोरोना भाइरसको संक्रमण तीव्र भइरहेकाले सबै परीक्षा भोलिदेखि नै स्थगित गर्न सरकारसँग सिफारिस गर्ने निर्णय लिएको बताएका थिए । तर त्रिविले सोमबारका लागि तय भएका परीक्षा जारी रहने जनाएको हो । त्रिभुवन विश्वविद्यालयका परिक्षा नियन्त्रक पुष्पराज जोशीले सोमबारको परीक्षा यथावत रहेको जानकारी दिए । 'स्नातक दोस्रो वर्षको परीक्षा चलिरहेको छ । भोलिका लागि तय भएको परीक्षा थयावत छ । बिहान ७ बजेदेखि नै परीक्षा भएकाले हामीले रोक्न सक्दैनौं,' उनले भने, 'आज म्यानेजमेन्टको सकियो । भोलि बिएड, बिएस्सी र बीएको परीक्षा छ ।' कोरोना संक्रमणलाई ध्यानमा राखेर दिनमा दुई सिफ्टमा परीक्षा लिइरहेको जोशीले बताए । सीसीएमसीले सिफारिस गरेको समाचार आएपछि त्रिविका पदाधिकारीबीच सल्लाह गरेर नै सोमबारको परीक्षा यथावत रूपमा सञ्चालन गर्ने निर्णय लिइएको उनले बताए । 'सीसीएमसीबाट हामीलाई कुनै जानकारी आएको छैन । परीक्षा स्थगित गर्न सिफारिस गर्यो भन्ने बित्तिकै हामी अलर्ट भयौं । हाम्रो बोर्ड बैठक बस्छ भोलि र त्यसपछि के गर्ने भन्ने सल्लाह गरौंला भन्ने भएको छ,' उनले भने । परीक्षा बोर्डका अध्यक्ष, रजिष्टार र परीक्षा नियन्त्रकबीच छलफलपछि सोमबारको परीक्षा यथावत रूपमा सञ्चालन गर्ने निर्णय भएको हो । स्नातक दोस्रो वर्षको परीक्षा वैशाख १७ गते सकिने र त्यतिबेलासम्म सञ्चालन गर्न पाएमा रिजल्टको तयारी गर्न सकिन्थ्यो भन्नेमा त्रिवि रहेको उनले जानकारी दिए । विद्यार्थीले पनि परीक्षा सञ्चालन गरिदिए हुन्थ्यो भनिरहेको उनको भनाइ थियो । नेपालगन्जमा सबैभन्दा बढी कोरोना संक्रमण भएको अवस्थामा पनि स्वास्थ्य मापदण्ड अपनाएर परीक्षा सञ्चालन भइरहेको जोशीले जानकारी दिए । निशेधाज्ञा लागेमा के गर्ने भन्ने निर्णय लिने र सोमबारका लागि तय भएको परीक्षा भने यथावत रहने उनले दोहोर्याए ।
