ललितपुर । दक्षिण ललितपुरको वागमती गाउँपालिका–४ प्युटारमा रहेका विद्यालयहरुमा बैकल्पिक सिकाई प्रणाली लागु गरिने भएको छ ।
मुलुकमा कोरोना भाइरस (कोभिड–१९) को जोखिम अवधिभर प्युटारमा रहेको शिक्षा समितिले बालबालिकाको शैक्षिक सुधारका लागि टोलटोलमा ‘सिकाई टोल समुह’ गठन गरी उक्त प्रणाली अघि बढाउन लागेको हो ।
वडामा हाल ८ वटा विद्यालय रहेका छन् । हामीले साविकको प्रावि (१ देखि कक्षा ५) सम्म अध्ययन गर्ने हरेक विद्यार्थीलाई सो प्रविधिमार्फत शिक्षा दिलाउन लागेको वडाध्यक्ष नारायण बहादुर घलेले जानकारी दिए । उनले भने, “हामीसँग आधारभूत तहका ६ वटा र माध्यमिक तथा उच्च माध्यमिक तहका हाल एक–एक वटा विद्यालय रहेका छन् ।” प्युटारका हरेक विद्यालयमा १ देखि ५ सम्म अध्ययनरत विद्यार्थीले टोलटोलमा स्वयंसेवक शिक्षकबाट अध्ययन गर्ने मौका पाउनेछन् । समय समयमा सम्बन्धीत विद्यालयका शिक्षकले पनि उक्त कार्यक्रमको अवलोकन गरी आवश्यक वस्तुवारे जानकारी प्रवाह गर्ने व्यवस्था मिलाउन लागेको घलेले बताए ।
वडाले कक्षा ५ देखि १२ सम्म अध्ययनरत विद्यार्थीलाई विज्ञान, गणित र अङ्ग्रेजी विषय भने टेलिफोन लगायतका सामाजिक सञ्जालबाट अध्ययन गराउने भएको छ । सो तहका कक्षामा अध्ययनरत विद्यार्थीले यी तीन विषय बाहेकका अन्य विषय भने आफैले घरमै अध्ययन गर्नुपर्ने बताइएको छ । प्युटारमा धनडाँडा, बागमती, देउराली, गडीभञ्ज्याँङ, फुकेडाँडा र खैरेनी नामक ६ वटा आधारभूत तहका विद्यालय तथा चण्डेश्वरी नामक माध्यमिक र श्रीकालीदेवी नामक उच्च माध्यमिक विद्यालय रहेका छन् ।
