काठमाडौं । पछिल्लो २४ घण्टामा नेपालमा १४ सय ४२ संक्रमित थपिएका छन् । स्वास्थ्य तथा जनसङ्ख्या मन्त्रालयका अनुसार ६ हजार ७३१ जनाको पिसिआर परीक्षण गर्दा एक हजार ४४२ जनामा कोरोना पुष्टि भएको हो । नयाँ थपिएका सङ्क्रमितसँगै नेपालमा अहिलेसम्म दुई लाख १२ हजार ९१७ जनामा कोरोना पुष्टि भएकोे छ ।
काठमाडौं उपत्यकामा थप १ हजार ३८ जना कोरोना संक्रमित थपिएको मन्त्रालयले जनाएको छ । पछिल्लो २४ घण्टामा ४०३ महिला र ६३५ पुरुषलाई कोरोना पुष्टि भएको हो । थपिएका नयाँ संक्रमितहरुमध्ये काठमाडौंमा ८२२, भक्तपुरमा ४८ र ललितपुरमा १६८ जना छन् ।
२४ घण्टामा ३५ सय ३८ डिस्चार्ज भएसँगै कोरोना जित्नेको संख्या भने १ लाख ८२ हजार ७८० पुगेको छ । त्यस्तै पछिल्लो २४ घण्टामा १२ जनाको मृत्यु भएको मन्त्रालयले जनाएको छ । योसँगै कोरोनाले ज्यान गुमाउनेको संख्या भने १२ सय ५९ पुगेको मन्त्रालयले जनाएको छ ।
२८ हजार ८७८ जना आइसोलेशनमा छन् भने ९१० जना क्वारेन्टिनमा छन् । अहिलेसम्म नेपालमा १६ लाख २३ हजार ७५४ जनाको पीसीआर परीक्षण भएको छ ।
