काठमाडौँ।  सेवा प्रदायकबीच ‘स्पिड वार’ चलिरहेको बेला डिसहोमले पनि उच्च गतिको इन्टरनेट ल्याउने भएको छ ।

डिश होमले मेस राउटरसहित ३०० एमबीपीएस फाइबर इन्टरनेट योजनासहितको नयाँ इन्टरनेट प्याकेज घोषणा गर्ने तयारी गरेको छ।

कम्पनीका महाप्रबन्धक रमेश सापकोटाका अनुसार नयाँ फाइबरनेट प्लान एकदमै सुपथ मुल्यमा घोषणा गरिने छ । उनले दूरसञ्चार नियामक निकाय एनटीएमा शुल्क स्वीकृतिका लागि निवेदन पेश गरिसकेको जानकारी पनि दिए ।

मेस वाइफाइ प्रविधि भएको यो इन्टरनेट अन्य आईएसपीहरूको तुलनामा सस्तो र गुणस्तरीय रहने बताइएको छ।

यस अघि नै डिशहोमले हुवावेसँगको सहकार्यमा नेपाली बजारमा वाई-फाईको नयाँ प्रविधि वाई-फाई सिक्सको घोषणा गरिसकेको छ । 

 केहि समय अघि मात्रै  डिश होमले मल , विद्यालयहरू जस्ता भीडभाड भएका क्षेत्रहरूमा राम्रो जडानको लागि क्याम्पस वाइफाइ सुरु गरेको छ।
डिश होमको नयाँ ३०० एमबीपीएस प्याकेजले वर्ल्डलिङ्कको ६०० एमबीपीएस, भायनेटको १७५ एमबीपीएस र क्लासिक टेकको ५०० एमबीपीएस योजनासँग प्रतिस्पर्धा गर्नेछ।

हाल, डिश होमसँग 10/15/25/40/60/80/100 Mbps इन्टरनेट स्पीड प्याकेजको साथ १/३/६/१२ महिनाको सदस्यता योजना छ।